You are here

హ్యాపీ ‘వాలెంటైన్స్‌’ డే

ప్రేమికుల రోజు అంటే… యువతకు పండగే. అసలే ప్రేమ పక్షులు… ఏకాంత ప్రాంతానికి ఎగిరిపోవాలని అందమైన గులాబీలతో తమ ప్రేమను పరస్పరం వ్యక్తీకరించుకొవాలని భావిస్తుంటారు . పువ్వుల్లోని పరిమళం, మకరందం జీవితంలోనూ ఉండాలని, మది నిండా ఆ పరిమళాలను ఆస్వాదిస్తూ  అనుభూతించాలనుకునే రోజు. ఉత్కంఠ… ఉద్వేగం… ఉత్సాహం… ఉరకలు వేసే ప్రాయంలో తమకంటూ కొన్ని ప్రత్యేకమైన క్షణాలను ప్రోదిచేసుకొని  ఆ అనుభూతిని జీవితాంతం నిలుపుకోవాలని ఉవ్విళ్లూరుతారు. ఇది ప్రపంచవ్యాప్తంగా యువత నిర్వహించుకొనే ప్రేమోత్సవం.

తమ మనుసులోని ఫీలింగ్ ను లవర్ కు ఎక్స్ ప్రెస్ చేయాలని కొందరు భావిస్తుంటే… మరికొందరు తమ లవ్ రిలేషన్ ను లైఫ్ లాంగ్ గుర్తుండిపోయేలా సెలబ్రేట్ చేసుకుంటున్నారు. యువతీ యువకులు.. గిఫ్ట్ షాపులు.. గ్రీటింగ్ కార్డులతో తమ పార్ట్ నర్ ను సర్ ప్రైజ్ చేసేందుకు రెడీ అయ్యారు.  ఇప్పటికే సిటీలో పలు చోట్ల ఫ్రీ వాలైంటైన్స్ డే సెలబ్రేషన్స్ గ్రాండ్ గా జరిగాయి.

Happy Valentines day

ప్రపంచవ్యాప్తంగా ప్రేమ పరిమళాలు వ్యాపిస్తున్నాయి. పూలపరిమళం లాంటి ప్రేమ మాధుర్యాన్ని శాశ్వతంగా నిలుపుకోవాలనుకుంటున్నారు ప్రేమికులు. పల్లెల నుంచి పట్టణాల వరకూ అక్కడ నుంచి నగరాలకు ప్రేమాలయాలు పెరిగిపోతున్నాయి. అసలు ఫిబ్రవరి 14కి వాలెంటైన్స్ డే ఎలా గుర్తింపు వచ్చిందంటే…క్రీస్తు శకం 270 ప్రాంతంలో రోమ్‌లో వాలెంటైన్స్‌ అనే క్రైస్తవ ప్రవక్త ఉండేవాడు. ప్రేమ వల్ల ప్రపంచం ఆహ్లాదంగా, ఆనందంగా మారుతుందని అతని అభిప్రాయం. అందుకే రహస్యంగా యువతీ యువకులకు ప్రేమోపదేశాలు చేసి, వారిలో ప్రేమ వివాహాలను ప్రోత్సహించడం ప్రారంభించాడు. వాలెంటైన్స్‌కి రోజురోజుకు అభిమానులు పెరిగిపోవడంతో రోమ్‌ రాజు క్లాడియస్‌కి భయం పట్టుకుంది.

దేశాన్ని కాపాడాల్సిన యువతకు ప్రేమ పాఠాలు నేర్పి బలహీనులుగా తయారుచేస్తున్నాడన్న అభియోగంపై క్లాడియస్‌ వాలెంటైన్‌కి మరణశిక్ష విధించాడు. వాలెంటైన్‌ అభిమానుల్లో క్లాడియస్‌ కుమార్తె కూడా ఉండటం విశేషం. ప్రేమకు మారుపేరుగా మారిన వాలెంటైన్‌ను ఫిబ్రవరి 14న ఉరితీశారు. వాలెంటైన్‌ మరణించిన తరువాత రెండు దశాబ్దాలకు క్రీ.శ. 496లో అప్పటి పోప్‌, గెలాసియస్స్‌ ఫిబ్రవరి 14ను వాలెంటైన్స్‌ డేగా ప్రకటించాడు. ఎక్కడో రోమ్‌లో, అదీ శతాబ్దాల క్రితం జీవించిన ఒక క్రైస్తవ ప్రవక్త పేరుతో మొదలైన ఈ ప్రేమికుల రోజు ఇప్పుడు ప్రపంచం ప్రేమికుల దినోత్సవంగా మారిపోయింది.

Happy Valentines day

ప్రేమికుల మధ్య ఉండాల్సిన ప్రేమ, అవగాహన, నమ్మకం రోజురోజుకు ఆవిరైపోతున్నాయి. నేటి సమాజంలో ప్రేమికుల మధ్య ప్రేమ కంటే ఆకర్షణే ఎక్కువగా కనబడుతోంది. ప్రేమంటే… కళ్ల ముందున్న ప్రేయసిని చూసి మురిసిపోవడం కాదు, ఆ ప్రేమ కనుమరుగైనప్పుడు కలవరపడడం, నిత్యం ఆ జ్ఞాపకాలతోనే బతకడం కూడా ప్రేమే. అలాంటి ఈరోజును మధురానుభూతి పంచేలా.. ప్రేమ త్యాగాన్ని మాత్రమే కోరుకుంటుందని గుర్తుచేస్తూ..గ్రేట్ తెలంగాణ.కామ్ ప్రేమికుల రోజు శుభాకాంక్షలు తెలియజేస్తోంది..

Related Articles